रुबाइ

की कहू ओ बाट तँ हम बिसरि गेलहुँ

जाहि पर साइत अहाँ अबै-जाइ छलहुँ

की हेतै जँ छोड़िए देब हमरा

हम तँ मिलन विरह सँ उपर गेलहुँ

गजल

क्लस्टर बम,प्रक्षेपास्त्र टामहाक हमरे छल
जीवित लहास बनल जे इराक हमरे छल

भारत,सोनार बंग आकि पाक हमरे छल
“एकोहंबहुस्याम”-ई मजाक हमरे छल

एखन भने परमाणु कचरा केर याचक छी
‘विश्वगुरु हम छी’-से वेदवाक् हमरे छल

गांधी छलहुँ जखन हमरे सुराज छल
दागी पर खादी केर झक पोशाक हमरे छल

हमरे ओ मुण्ड छल कटि गेल जे रैजकी सँ
बाजारक बीच पड़ल कान-नाक हमरे छल

हमरे छल डिडिर जे बाँटलक सहोदर केँ
अधरतिया आजादीक ढोल-ढाक हमरे छल

‘अबिरन’रहबैया छी रोगहा समाजक हम

लसनि जेकर लागल अछि से सुजाक हमरे छल

गजल

मिरदङियाक तरंग भँसियाइए अङेजब कोना  

सुनि मोन घुरमाइए अकुलाइए अङेजब कोना 

आँखिक नोर झरलै बनलै अजस्र धार झझाइए

पियासल छी ठाढ़, जी हदबदाइए अङेजब कोना 

सगुन बान्हसँ बान्हल ऐ मोनक उछाही बिच

ठाढ़ सगुनियाँ बनल उसरगाइए अङेजब कोना 

हरसट्ठे अपने अपन चेन्हासी मेटा लेलक आइ

मुरुत हरपटाहि बनेने जाइए अङेजब कोना 

छरछर बहल छै धार मोनक, देखू चलल अछि

धेने बनल बाट उधोरनि बनैए अङेजब कोना 

उड़ैए चिड़ै आ बहैए अनेरे ऐ नील अकाश बिच

ऐरावत-मन जखन उधियाइए अङेजब कोना 

गजल

ओङठल आँखि ताकैए कहू की करी

नै बुझलौं तमसाइए कहू की करी

ज्ञानी बनै लेल जाइए देश छोड़ने

ई मोन जे पथराइए कहू की करी

धानी रंगक आगि पियासल किए छै

धाना निश्छल हिलोरैए कहू की करी

धान छै खखरी बनल अहिठाम आ

धानी आगि जे लहकैए कहू की करी

आगिक संगी पानि अजगुत देखल

धौरबी बनल सोचैए कहू की करी

ऐरावत धोधराह धुधुनमुहाँ नै

जरि फाहा बनि बजैए कहू की करी

गजल

की कहबै, कोना कहबै, जे बुझतै ओ लुझतै ओ

आँखिक नोर खसतै,    खन रूसतै-बिहुसतै ओ

दाबी देखेतै आ हम देखबै नुका कऽ अँचरासँ

बहरा जाइ छी घबरा कऽ, नै ताकै ओ ने बाजै ओ

देखितिऐ अँचरासँ, आ बहरा जैतौं दुअरासँ

मोनसँ बेसी उड़ै चिड़ै, चिड़ैक मोन बनतै ओ

बनि माँछ अकुलाइ छी बाझब जालमे कक्खन

जँ फँसि त्राण पाएब आँखि बओने से देखतै ओ

चम्मन फूल भमरा, गुम्म, जब्बर, छै सोझाँ ठाढ़

जलबाह सोझाँ  माँछ, ऐरावत बनल, देखै ओ

कता

अँहाक कुशल तँ अपने कुशल बुझाइए

तँए एक दोसराक कुशल मनाबी

अँहाक कष्ट तँ हमरो अपने बुझाइए

तँए एक दोसराक भार उठाबी

रुबाइ

रुसल आइ जान हमर देखू अजगुत

छूटल आइ जान हमर देखू अजगुत

जी ने सकी हम हुनका बिनु केखनो

बूझल आइ जान हमर देखू अजगुत

कता

जहरक मारल जी जाएत आँखिक नहि

इ बड़का अजगुत प्रेमक संसार मे

अनकासँ जीतब मुदा अपना सँ नहि

इ बड़का अजगुत प्रेमक संसार मे

कता

मोन करैए अँहाक कोरा मे सूती

निशा भरल आँखि मे बेर-बेर डूबी

जहिआ सँ देखलहुँ अँहाक सुन्नरि रुप

की कहू सजनी सुतली राति मे उठी

रुबाइ

ओ जखन देखैए हमरा बेर-बेर

हिलकोर उठैए बूझू बेर-बेर

अँहा हमरे छी आ हमरे टा छी

इ बात करेज कहैए हमरा बेर-बेर

गजल

जे काल्हि तक हमर नसीब छल।
ओ आब नाञ हमर करीब छल॥

ई दुनिया के रीत के लग से देखू।
रूप हिनकर बड़ा अजीब छल॥

ओ छल से आय धनिक बनि गेल।
जे काल्हि तक बड़का गरीब छल॥

बेटा के लेल करलों कोबला-पाती।
बेटी भेला पर बदनसीब छल॥

विधना के रीत की हम फरछाबी।
ई शुरूए से हमर नसीब छल॥

गजल

जों सभगोटे माटिक सपत्थ खाs लेब।
मनुखक बीचक देबार खसाs देब ॥

तब बनत अपन मिथिला महान ।
जों क्रान्तीक एकटा मशाल जलाs लेब॥

करेजाक आँगि जों पानि से नै मिझत।
सपत्थ, जे लहू से एकरा मिझाs देब॥

जों मिथिला माँगत ई प्राणक आहुती ।
हम हँसि के अपन मुंडी चढ़ाs देब॥

हमरो ई ग़ज़ल अमर भs जाएत ।
जों सभ गोटे सुर से सुर मिला लेब॥

रुबाइ

एहने किछु हल्ला ये देश अs विदेश में
भेड़िया सब घुमि रहल नेताक वेश में
सच आ की झुठ ये, फैसला करू अहें
केहन नौटंकी ई भए रहल देश में

रुबाइ

आइ तँ बात अँहाक नहि मानब हम

बस खाली अँही टा के जानब हम

अँहा बरु आ लिअ सप्पत नहि अएबाक

जिनगी भरि तँ अँहिक बाट जोहब हम

कता

नेता के गरा मे बान्हल घैल बूझू

डूबल देशक नाम कहबै तँ भारत हएत

दलाल आ गुंडाक हाथ फैल बूझू

लूटल देशक नाम कहबै तँ भारत हएत

रुबाइ

नेता आ चोर के की करी समीक्षा
चुप्पो रहय के नै करय ये ईक्षा
नेता से कहियो अखनो सुधैर जाऊ
जनता के आब ते नै लिया परीक्षा

कता

दूनू मे कोनो फर्क नहि हमरा बुझने

उड़ीस आ दलाल के एकै बूझू

दूनू मे कोनो फर्क नहि हमरा बुझने

नेता आ मच्छर के एकै बूझू

गजल

घुस जाल-फरेब तिलक-दहेज़ उत्पिरण अत्याचार नहि बदलल
समूचा संसार बद्लिगेल आखिन धरि बिहार नहि बदलल

जाती-पांतिक भेद नहि बदलल समाजक आधार नहि बदलल
कोषिक धार बदलिगेल मित! जिवन धार नहि बदलल

महाभारत भेल"यातोधर्मस्तातो जय:"कहल जैत छै मुदा
छल-प्रपंच आ भाई-भाई मे वैमनास्यक बिचार नहि बदलल

हजारो द्रोपदी"दुःख हरहूँ द्वारिकानाथ"के रट लगौने छथि
आखी फारीक'देखियौंन करोड़ो पांडवक सुख-संसार नहि बदलल

सूरज नहि हम अन्हारक बिरोधी छी तें मन मे कचोट शेष अछि
पुर्निमाक रति पर"दीपक"आमावासयाक अन्हार नहि बदलल

रुबाइ

ई देशक नेता बेकार भए गेल
जनताक लुटय ले तैयार भए गेल
देशक नोट, विदेश में ये राखैत
एहने ई देशक सरकार भए गेल

रुबाइ

नेता आ बाबा सँ देश परेशान अछि

मुदा एहने धंधा मे तँ उठान अछि

लोक तँ समीकरणे ने तेना बनबै छै

खून चुसनाहर बड़का लोक महान अछि

गजल

घरक' मोह ममता छोरिक'ओ बिहान चलि गेल
गरीबी सं तंग आबिक' ओ आसाम चलि गेल

हथियाक ' हाल बत्तर चित्राक' सेहो नहि बरसल,
एहि रौदिक मुह मे कित्तक'-कित्तक'धान चलि गेल

रुबाइ

इतिहास बदलि जेतै जँ उठतै आँखि
बिसबास बदलि जेतै जँ उठतै आँखि
केकर हिम्मत जे देखत अहाँ दिस
बदमास बदलि जेतै जँ उठतै आँखि

मास मइ 2011क लेल गजल पुरस्कार योजनाक पहिल चरण

हमरा इ सूचित करैत बड्ड नीक लागि रहल अछि जे " अनचिन्हार आखर"द्वारा स्थापित पुरस्कार " गजल कमला-कोशी-बागमती-महानंदा" पुरस्कारक पहिल चरण ( मास मइक लेल ) पूरा भए गेल अछि। मास मइक लेल सुनील कुमार झाक एहि रचना के चयन कएल गेलैन्हि अछि। हुनका बाधाइ।

दू टा ग़ज़ल


(१)
हुनका सों हँसि के बाजलों ते हल्ला मचि गेल
हुनक मुँह दिस ताकलों तs हल्ला मचि गेल

रूपक चन्द्रमा के कारी अमावस केने रही
चमकैत पूर्णिमा के देलों तs हल्ला मचि गेल

ओ नैनक कटार से सबके ये घायल केने
हम नजैर से जे ताकलों तs हल्ला मचि गेल

हुनक रूपक लाइट भक्क-भक्क जरैत ये
सबहक डिबिया मिझेलों तs हल्ला मचि गेल

ओ आँखिक इशारा जे मारलक मुंडेर पर
हम फाँदि गेलों जे देबार तs हल्ला मचि गेल

अहों लिखूं ग़ज़ल ओ कहैत रहे सदिखन
करिया कलम जेs उठेलों तs हल्ला मचि गेल

(२)

चमरपट्टी में गाय मरल ते कोनो बात नै
बभनपट्टी में बेंग मरल हल्ला मचि गेल

हमर झोपड़ी खसाs के ओ महल बना लेलाs
फेर से दुछत्ती जे बनेलों ते हल्ला मचि गेल

ओ नोटक जोड़ पर बड़का नेता बनि गेल
हमर ईमान नै बिकल ते हल्ला मचि गेल

विदेशो में रहि, नै बिसरल अपन माँटि के
एता गामों में बाजलों मैथिली हल्ला मचि गेल

नै बिसरब अपन माँटि के करियों ई प्रण
जे सुनलक हमर ई गोप हल्ला मचि गेल






.

कता

जँ आँखि हमर नहि थकैए देखबा सँ
तँ अँही कहू सजनी हम की करू
जँ मोन नहि भरैए संग रहबा सँ
तँ अँही कहू सजनी हम की करू

रुबाइ

सोना बनब तँ अहाँ के जरहे पड़त
सदिखन नीक काज अहाँ के करहे पड़त
काज केनिहारक कमी नहि संसार मे
ओ जखन एतै तँ अहाँ के हटहे पड़त

रुबाइ

जँ आखर के हुनक ठोर भेटतै
बौआएल बटोही के बाट भेटतै
कोनो कारण सँ जँ केओ खसि पड़त
ओकरा लेल हजारो हाथ भेटतै

गजल

होइत छैक बरखा आ रे बौआ
कागतक नाह बना रे बौआ

देखिहें घुसौ ने चोरबा घर मे
हाथ मे ठेंगा उठा रे बौआ

तोरे पर सभटा मान-गुमान
माएक मान बढ़ा रे बौआ

छैक गड़ल काँट घृणाक करेज मे
प्रेम सँ ओकरा हटा रे बौआ

नहि झुकौ माथ तोहर दुशमन लग
देशक लेल माथ कटा रे बौआ

गजल

कानए लागल पात नुका कए राति मे
खीजए लागल पात नुका कए राति मे

बेशर्मीक हद टपि गेल केओ ने कहलक
हूथए लागल पात नुका कए राति मे

नहि छैक पाइ जे कराओत इलाज दर्दक
कूथए लागल पात नुका कए राति मे

अपने सँ नजरिबंद हम रंग-महल मे
देखए लागल पात नुका कए राति मे

सुआद लगलैक खाली शोणित केर
चुसए लागल पात नुका कए राति मे

अनचिन्हार देह-दरसक रहस्य बूझल
छूबए लागल पात नुका कए राति मे

कता

रामे जानथि आब करेज के की हएत
अहाँक नजरि सँ ओ तबाह भए गेल
रामे जानथि आब मोन के की हएत
अहाँक नजरि सँ ओ घबाह भए गेल

रुबाइ

ओ नजरि मे उतरि गेलथि बाते-बात मे
कारेज धरि गुजरि गेलथि बाते-बात मे
पहिल नजरि के पिआर एहने होइत छैक
ओ हमरा बिसरि गेल बाते-बात मे

गजल

हमर अरमान जरि गेल आय कोहबर घर में
हमर मुसकान मरि गेल आय कोहबर घर में

जे फुलवारी हम सजेने रही आय बीस बरख सों
तकर सब फुल झरि गेल आय कोहबर घर में

कहलक रहे बरसाइतक भार हमहीं आनब
बाटे तकैत थकि गेल आँखि आय कोहबर घर में

मधुश्रावणीक सब अरहुल निरमाल ये बनल
टेमी के सब फोंका सुखि गेल आय कोहबर घर में

समदिया के आनल पढ्लों जे विदागरी के समाद
बहुत दिनक बाद कानलों आय कोहबर घर में

गजल

इजोत लेल अन्हेर नगरी जाइत लोक
सपना मे सपनाक भात खाइत लोक

खेत आब पटाओल जाइछ शोणित सँ
पानि महँक तेल जकाँ छताइत लोक

जकरा जतेक भेटैक सएह बड़ अगत्ती
खएलाक पछातिओ गुंगुआइत लोक

छोड़लकै डनियाँ तेहन ने अगिनबान
मोने मे पजरि मोने मे पझाइत लोक

बसातक कमी भए गेलैक गामो मे
आँक्सीजनक बोतल मे औनाइत लोक